Urtarrilaren 3an Etxerat-ek Bilbon antolatutako manifestazioaren oinarri den manifestuak atxikipenak biltzen jarraitzen du.

Presoen alde 2.700 atxikimendu

Eider Goenaga


Eguberrietan euskal presoen eskubideen aldeko ekimenak biderkatu egiten dira, eta egun horiei amaiera emateko Etxerat-ek manifestazio nazionala antolatu du Bilbon, urtarrilaren 3an. Milaka eta milaka lagun biltzea espero dute, eta dagoeneko ehunka dira manifestazioaren oinarri den manifestuari euren atxikimendua eman dioten herritarrak. Etxerat-ek jakinarazi duenez, dagoeneko 2.700 lagunek egin dute bat manifestuarekin, eta herritarren, elkarteen, sindikatu zein bestelako taldeen atxikimendua biltzen jarraitzen dute. Hainbat arlotako eragileek manifestaziorako joateko deia egin dute dagoeneko: sindikatuek, irakasle eta ikasleek, abokatuek, idazleek, musikariek, medikuek, kazetariek...

Era guztietako jendea bildu zen herenegun urteko azken ostiralean ere, milaka, Euskal Herriko herri eta auzoetan. Besteak beste, 350 bildu ziren Bilbon, 200 Arrasaten, 150 Galdakaon, 130 Oiartzunen, 80 Zumaian eta 65 Basaurin. Atzo, bestalde, Mikelen Lagunak taldeak antolatuta, Elgoibarren giza katea egin zuten 75 bat lagunek, Mikel Ibañez preso gaixoaren egoera salatzeko. Espetxealdi arinduan dago Ibañez.

Presoen alde abian
Uztarria
Plataformak apalaldi baten ondoren berriro ekingo dio lanari. Eskakizunak aurrera eramateko gizarteko sektore desberdinen inplikazioa eskatu dute. Aurrerantzearen ere mobilizazio handiak antolatzeari ekingo diote.

Euskal Presoak Euskal Herrira plataformakoen prentaurrea.
Herriko Euskal Presoak Euskal Herrira plataformak apalaldi baten ondoren berriro lanean ekitera doala adierazi du. Plataforma 1997an hasi zen lanean, «hasieratik gune anitza izan da eta euskal presoen gaiaren inguruan burutu ditu lanak».
Plataformak, lanean jardun duen hiru urteotan, hainbat lan eta ekintza egin ditu: «Euskal Presoen Euskal Herriratzearen alde egindako adierazpena gizarteratzeari ekin genion, herriko ia talde eta elkarte guztien atxikimenduak lortuz. Manifestazio isil jendetsu bat baino gehiago ere egin dugu herrian, plataformak deituta», esan zuten plataformakoek prentsaurrean.
Plataformako apaldiaren arrazoia ere azaldu zuten: «Nahiz eta Euskal Herrian milaka mobilizazio egin, eta gure aldetik hainbat lan, gure eskakizunak modu beretsuan jarraitzen zutela ikusirik, zerbait gehiago egin beharra ikusi genuen; baina egia esatera ez genekien zer gehiago egin zitekeen».
Plataformak bere eskakizunak plazaratu zituen: «Euskal gizarteak eskatzen duelako, euskal presoak Euskal Herrira ekartzea, zigorraren hiru laurdenak beteak dituzten presoak eta gaixotasun larriak dituztenak kaleratzea, eta baita presoen izaera politikoa onartzea ere».
Eskakizunak aurrera eraman eta egoera aldatzeko egin beharrekoak ere aipatu zituzten: «Argi daukagu orain arte eginikoa ez dela alferrikakoa, baina baita ere eginikoa ez dela nahikoa. Gizartearen eskakizunak bete edo ez gizarteko sektore desberdinen inplikazioaren baitan dago».
Aurrera begira jarri dituzten egitekoen artean, honokoak: atxikimendua eman duten taldeen inplikazioa lortzea, Euskal Presoak Euskal Herrira maindirea gizarteratzea eta mobilizazio erraldoiak antolatzea.